Partnerske wokrjesy Zhorjelskeho wokrjesa

Po politiskim přewróće nawjaza tójšto sakskich wokrjesow we wobłuku natwara swojeho zarjadnistwa kontakty k wokrjesam w starych zwjazkowych krajach. Tak tež wokrjesy-předchadnicy Zhorjelskeho wokrjesa. Předewšěm w lětach 1990 do 1996 podpěrowachu sobudźěłaćerjo krajnoradnych zarjadow natwar nowych zarjadniskich strukturow. Partnerske zrěčenja buchu wotzamknjene, kiž mějachu zaměr, ludźi mjez sobu zbližeć a kontakty na hospodarskej a kulturnej runinje kaž tež w sporće a turizmje wutworić. Tute partnerstwa pěstuja zarjadnistwa a towarstwa kaž tež ludźo we wosobinskich přećelstwach jara čile dale.

Nimo toho so přećelske styki k susodnymaj krajomaj Pólskej a Čěskej nawjazachu, kotrež buchu tohorunja z partnerskimi zrěčenjemi wobkrućene. Wokrjes Lubij-Žitawa bě wusko zwjazany z Krajom Liberecom, byrnjež bjez wopisma a pječata. Prěnje zhromadne projekty mjez wokrjesom Zhorjelcom a susodnym čěskim wokrjesom na polu turizma, kultury a wobchada hižo běža. Wot 2002 wobsteja tež k italskemu městu Gorizia a słowjenskemu Nova Gorica přećelske styki. Z tutym kontaktom wjaza so wotpohlad, zo móža so potom europske spěchowanske programy wužiwać a zhromadne projekty realizować. Wokrjes Zhorjelc chce kooperaciju z wuchodnej Europu, wosebje z regionom Wyšgorod w Ukrainje, w přichodźe zesylnić. Pozadk toho su wuhlady na móžne kooperacije mjez małymi a srjedźnymi předewzaćemi kaž tež w socialnym a kulturnym wobłuku.