Kultura

Zamóžite města w srjedźowěku a rozkćěwaca industrija w 19. lětstotku přihotowachu pódu za mnohostronsku kulturnu krajinu. Wokrjes Zhorjelc je bohate dźědźinstwo přewzał. Tu je rjad muzejow z nadregionalnym wuznamom. Wulki Žitawski póstny rub z lěta 1472 w Muzeju swj. křiža a Mały póstny rub z lěta 1573 w Kulturnohistoriskim muzeju klóšter franciskanow stej w Němskej a Europje jónkrótnej.

Gerharta Hauptmannowe dźiwadło w Žitawje a Zhorjelcu je swojeho wulkotneho činohrajneho kaž tež hudźbneho a rejwaneho dźiwadła dla znate. Lěsne jewišćo Jonsdorf, dźiwadło „Wucho“ při Bjerwałdskim jězoru, Park wjercha Pücklera a dalše wosebite městnosće bywaja w lěću kulisa lětnich předstajenjow. Nadróžny dźiwadłowy festiwal ViaThea Zhorjelc/Zgorzelecz kóžde lěto tysacy zajimcow přiwabja. Wosebite dožiwjenje je Transnaturale, festiwal swěcy a zwuka, při Bjerwałdskim jězoru.

Wokrjes Zhorjelc twori hromadźe z wokrjesom Budyšinom kulturny rum Hornja Łužica/Delnja Šleska, kotryž so přez kulturny dawk čłonow a podźěle komunow financuje. Jeho hłowny nadawk je financna podpěra nošerjow regionalnje wuznamnych kulturnych zarjadnišćow a naprawow. Wokrjes Zhorjelc pak ma tež swójsku towaršnosć: Kulturnu a dalekubłansku towaršnosć (Ku-Weit). Wona rjaduje kubłanske a dalekubłanske poskitki wokrjesneje ludoweje uniwersity, wokrjesneje hudźbneje šule a Biblioteki Christiana Weisy w Žitawje. K tomu słušeja tež Medijo-pedagogiski centrum Lubij, wokrjesej podstejace internaty za powołanskich šulerjow kaž tež cyłkowny management za kulturny pomnik Sólnica w Žitawje. Dalše informacije pod: www.ku-weit.de